LAOAG CITY – Agtultuloy ti imbestigasion ti Commission on Elections (COMELEC) mainaig kadagiti nagkandidato nga immawat ti donasion manipud kadagiti contractor.
Segun iti poll body, am-ammoen ti Political Finance Department dagiti datos iti Midterm Elections basar kadagiti Statements of Contributions and Expenditures (SOCE).
Immunan nga inbatad ni Commission on Elections Chairman George Erwin Garcia nga addan dagiti inisyal a listaan nga insigida a nakitan nga addaan ti posible a contractor.
Malaksid iti napalabas a midterm elections, kiddawen pay ti Commission on Elections a sublianan ti 2022 presidential elections ken kitaen dagiti dadduma pay a contributors a saan laeng a public works contractors.
Kabayatanna, rumrummuar kadagiti sumagmamano a report a maipagarup nga immawat ni Vice President Sara Duterte ti campaign donation manipud iti maysa a dakkel a kontratista ti flood control project iti Davao Region.
Basar iti Statement of Contributions and Expenses ni Vice President Sara, maipagarup a nangipaay ti Escandor Development Corporation a kukua ti pagayam dagiti Duterte a ni Glenn Escandor ti sumurok ₱19 million para iti campaign ads daytoy idi 2022 elections.
Iti report met ti Philippine Center for Investigative Journalism (PCIJ), dimmakkel dagiti kontrata ti Genesis88 Construction manipud iti Department of Public Works and Highways (DPWH) iti panawen ti administrasion ni dati a Presidente Rodrigo Duterte.
Manipud idi 2018 agingga iti 2024, nakaala ti kompania ti agarup ₱7 billion a gatad ti kontrata pakairamanan ti sumurok ₱2.9 billion iti nagbaetan ti 2023 ken 2024.
Immunan a naipadamag a maipagarup a nakaala ti kabsat ni Vice President Sara a ni Davao City Representative Paolo Duterte a dumanon iti ₱51 billion a pundo para iti flood control projects iti maudi a tallo a tawen ti napalabas nga administrasion.
