LAOAG CITY – Immanamong ti Hamas ti pannakawaya-waya dagiti amin a nabatbati nga hostages idiay Gaza.
Kiddawen ti Hamas ti nayon a negosasion iti sumagmamano nga isyu a naidatag iti plano ti kappia ti Estados Unidos bayat a mapaay a mangsolbar kadagiti kangrunaan nga aspeto daytoy pakairamanan dagiti panagdawat iti pannakaikkatna iti armas ken pannakaikkatna iti akemna iti panagturay ti Gaza.
Inbatad ni United States President Donald Trump a patienna a ti Hamas ket nakasagana para iti agnanayon a kappia idinto a ginutigotna ti Israel nga isardeng ti panagbomba ti Gaza.
Mainaig iti daytoy, kuna ni Israeli Prime Minister Benjamin Netanyahu nga agsagsagana ti Israel nga insigida a mangipatungpal iti umuna a paset ti plano ni Trump.
Naammoan a ginasut a Palestino ti agbirbiruk iti kinalawag maipanggep kadagiti kaudian a political statements no dagitoy ti mangpatingga iti humanitarian disaster.
Kabayatanna, adu ti mapilitan nga Hamas nga umawat iti uray sumagmamano laeng a punto ti katulagan ti Gaza.
