LAOAG CITY – Sinuspenso pay laeng ti Senate Blue Ribbon Committee ti imbestigasion kadagiti maipagarup nga anomalya iti flood control projects.
Inbatad ni Sen. Panfilo Lacson, awan ti panagdengngeg inton sumaruno a lawas kalpasan a naammoan a saan pay a nakasagana dagiti dawdawatenda a dokumento iti Department of Justice (DOJ) ken Manila Regional Trial Court (RTC).
Nadakamat a naikeddeng koma ti panagdengngeg ti panel inton Oktubre 8 nga orihinal a naikeddeng iti kiddaw ni Senador JV Ejercito tapno paayaban ni dati a Department of Public Works and Highways Regional Director IV-B Engr. Gerald A. Pacanan.
Kunana nga adda ti panaggiddan a panagdengngeg para iti budget ken Commission on Appointments (CA) a mangitunda ti conflict iti schedule ti lupon.
Gapu iti daytoy, inpakaammo ni Lacson ken ni Senate President Vicente “Tito” Sotto III ti temporario a pannakakanselar ti panagdengngeg agingga a maaddaan ti ad-adda a maiyannatop a panawen ken kumpleto a dokumentasion.
