LAOAG CITY – Nangipatulod ti Ilocos Norte Electric Cooperative ti 10 a linemen da idiay Masbate tapno mapan da tumulong nga agtarimaan kadagiti nadadael a linya ken poste ti kuryente gapu iti iduduprak ti bagyo Opong iti kallabes.
Basar iti kooperatiba, 40 a porsiento dagiti nadadael kadagiti linya ti kuryente ti Masbate Electric Cooperative.
Inbatad ni Mr. Perry Martinez, ti Acting General Manager iti Ilocos Norte Electric Cooperative, bassit pay ti naisubli ti kuryente na idiay Masbate isut gapuna a napanunot na ti mangipatulod kadagiti linemen da tapno mapan tumulong.
Maipalagip a daytoyen ti maikadwa a panangipatulod ti kooperatiba kadagiti linemen da tapno mapan tumulong iti sabali a lugar a mangisubli ti supply ti kuryente.
