LAOAG CITY – Nagballaag ni United States President Donald Trump iti alisto a panagsarita ti Hamas ken Israel mainaig iti plano idiay Gaza.
Daytoy ket kalpasan ti panangrugi a panagsarita iti nagbaetan ti Hamas ken Israel ken panangikagumaan ni Trump a maipatungpal ti Gaza peace plan iti kabiitan a panawen.
Nakipagpaset iti nasao a panagsarita ti Hamas, Qatar ken Egypt no sadinno nga immannugot ti Hamas kadagiti sumagmamano a paset ti Trump’s 20-point plan pakairamanan ti pannakawaya-waya ti Israeli hostages ngem saanda nga inakseptar dagiti amin a kondision daytoy.
Indauloan ni Khalil al-Hayya ti Hamas delegation a ginandat ti Israel a papatayen isuna idiay Qatar iti napalabas a bulan.
Mainaig iti daytoy, inpetteng ni Trump a masapul a ti first phase ti saritaan iti nagbaetan ti dua a grupo ket nasken a malpas ita a lawas.
Kabayatanna, agtultuloy ti panangiwayat ti Israel ti strikes idiay Gaza a nakatayan ti 24 a Palestino iti uneg laeng ti 24 nga oras.
