LAOAG CITY – Pormalen a nagsapata ita nga aldaw ni dati a Department of Justice Secretary Jesus Crispin ‘Boying’ Remulla kas maikapito nga Ombudsman ti pagilyan.
Indaulwan ni Supreme Court Senior Associate Justice Marvic Leonen ti oath taking ceremony iti mismo a Korte Suprema.
Ti pannakatudok ni Remulla kas Ombudsman ket kalpasan ti panangpili ni Presidente Ferdinand Marcos Jr. manipud iti shortlist ti Judicial and Bar Council.
Sinukatan ni Remulla ti nagretiro a ni Samuel Martires.
Sakbay met a nagbalin nga Ombudsman ket nagserbi kas Department of Justice Secretary, Representative iti 3rd District of Cavite manipud 2004 agingga iti 2010 ken Representative met laeng iti 7th District manipud 2010 agingga iti 2013.
Naelektaran pay a gobernador manipud 2016 agingga iti 2019 sakbay a nagsubli iti House of Representatives ken nagserbi pay kas Senior Deputy Majority Leader manipud 2019 agingga iti 2022.
