LAOAG CITY – Inawagan ni Senador Raffy Tulfo nga “immoral” ken “eskandaloso” ti maipagarop nga overpriced body-worn cameras a ginatang ti Philippine Ports Authority (PPA) idi 2020, no sadinno a maipagarop nga immabot ti P879,000 ti kada unit ti balor na.
Iti panangimbestigar ti pondo ti Department of Transportation (DOTr) ken dagiti attached agencies na, kwinestyunaran ni Tulfo ni Philippine Ports Authority General Manager Jay Santiago mainaig iti nasao a procurement, a naisayangkat iti babaen ti kontrata iti Boston Home Inc., maysa a kumpanya nga addaan ti P10 milyon laeng nga paid-up capital ngem naikkan ti kontrata nga arigna bilyon ti balorna.
Inpetteng ni Tulfo a dati metten a nakwestyunaran ti nasao a kumpanya gapu iti depektibo a kagamitan nga indeliber da iti Environmental Management Bureau (EMB).
Segun met ken ni Santiago, dimmala iti usto a proseso ti amin ken naisayangkat daytoy iti babaen ti National Port Surveillance Center.
Inkalintegan na a saan laeng a dagiti camera ti nagatang no di ket ti sibubukel a sistema dagiti server.
Saan a kumbinsido ni Tulfo ken inyarigna pay daytoy iti nababbaba ti balor na a body cameras ti Philippine National Police (PNP) nga agbalor laeng ti P135,000 ti tunggal maysa.
Iti maikadwa a procurement dagiti body-worn cameras, inpetteng ni Tulfo nga umaboten iti P1 milyon ti presyo ti kada unit, no sadinno a P168 milyon ti pakabuklan a balor ti kontrata.
Innayon ni Tulfo a no nangisayangkat ti naurnus a due diligence ti Philippine Ports Authority, maamoan da nga apartment laeng ti opisina ti nasao a kumpanya.
Inpetteng met ni Santiago a saan a mangipapaay ti advance payment ti Philippine Ports Authority ken ipaspasigurado da a naideliver ken awan ti problema kadagiti kagamitan sakbay a bayadan da.
Mainaig iti daytoy, kiniddaw ni Tulfo iti Department of Transportation nga imbestigaren da ti isyu ken ikkaten iti pwesto dagiti rumbeng a maikkat.
