LAOAG CITY – Umabot iti 13 a tattao ti natay kalpasan ti pannakaatake ti maysa kadagiti nabatbati nga ospital idiay el-Fasher, ti ciudad iti Sudan a maip-ipit gapo iti riribok.
Malaksid kadagiti natay, adda pay ti 16 a nasugatan pakairamanan ti doktor ken nurse kalpasan pay ti panangbomba ti paramilitary Rapid Support Forces (RSF) ti Saudi hospital iti sumagmamano a daras.
Inawagan ti maysa a grupo dagiti Sudanese medics a ti pangatake ket maibilang a war crime.
Kalpasan ti insidente, nabubuong dagiti tawa ken arig na marpuogen ti pasilidad no sadinno dagiti debris ket naiwarwara iti datar.
Naamoan a ti Rapid Support Forces ket ararauten nan ti el-Fasher iti nasuroken a 17 a bulan a nangitunda iti pannakaapektar dagiti rinibo a tattao ken panagbisin dagitoy.
