LAOAG CITY – Manarimaan ti panangtingiting ti Office of Civil Defense (OCD) ti kinalawa ti epekto ti magnitude 7.4 a gingined a nagsentro idiay Davao ngem dimmanon pay iti tallo a dadduma pay a rehion idiay Mindanao.
Basar iti report kadagiti regional office ti OCD, naapektaran ti gingined dagiti rehion ti Caraga, Soccsksargen ken Northern Mindanao (R10).
Inbatad ni Office of Civil Defense Asec. Bernardo Rafaelito Alejandro IV, nakaiteden ti report ti regional office dagiti inisyal a pannakadadael kadagiti nagduduma a pampubliko nga istraktura kas kadagiti pasdek, kalsada ken dagiti rangtay.
Inlawlawagna a dumaldalan iti validation tapno maipasigurado a tugma dagiti agbalbalin a report ti Office of Civil Defense a pangibasaran dagiti maiwaywayat a rehabilitasion ken humanitarian operation kadagiti nadakamat a rehion.
Iti agdama, adda idiay Davao dagiti nangangato nga opisial ti Office of Civil Defense para iti panangtingiting ken evaluation iti epekto ti gingined kadagiti komunidad.
Indauloan dagiti regional office ti Office of Civil Defense ti pannakikoordinar kadagiti lokal a gobierno tapno makaukkon ti impormasion mainaig kadagiti nadadael.
Karaman iti inisyal a nadakamat ditoy ket ti agarup 400 a pagadalan a nagrikki idinto a dagiti sumagmamano a rangtay, kalsada ken pampubliko a pasdek ket nakita a nadadael.
Kabayatanna, awan ti problema iti komunikasion iti baet ti epekto ti gingined iti communication lines iti dakkel a paset ti Mindanao.
