LAOAG CITY – Inbatad ni Madagascar President Andry Rajoelina nga agkamang iti natalged a lugar gapo iti pangta iti biag na iti baet ti manon a lawas a panagprotesta ken panawagan iti panagbaba na iti pwesto.
Segun kenni Rajoelina, maipagarop a plano ti grupo dagiti military personnel ken pulitiko a papatayen isuna.
Kabayatan ti panagbitla na ket saan nga ammo ti ayan na ngem adda dagiti agwarwaras nga impormasyon a pimmanaw iti pagilyan da babaen iti French military aircraft.
Daytoy ket kalpasan ti sumagmamanon metten nga aldaw a panagprotesta a kangrunaan nga idadaulwan dagiti agtutubo a demonstrador a gagem da a maikkat daytoy iti pwesto.
