LAOAG CITY – Inrakurak ni Ombudsman Jesus Crispin ‘Boying’ Remulla nga adda dagiti maipagarop a nangangato nga opisyal ti gobierno a karamn iti flood control projects anomaly.
Segun ken ni Ombudsman Remulla, karaman dagiti sumagmamano a nangangato nga opisyal ti gobierno kadagiti kaso nga isagsagana ti Office of the Ombudsman.
Kuna na nga adda dagiti impormasyon a makalkalap da iti agdama, kangrunaan na ti bank to bank transfer dagiti kwarta pera.
Gapu iti daytoy, inbatad ni Remulla nga agkiddaw da ti tulong manipod iti Anti-Money Laundering Council maipanggep kadagiti bank records dagiti madakdakamat nga opisyal ti gobierno.
Inaramid daytoy ni Remulla kalpasan ti pormal a panangipasa wenno panangi-refer ti Department of Justice iti sumagmamano a kaso kontra kadagiti kurakot nga opisyl ken dagiti karaman nga indibidual.
Insumitir ti Department of Justice ti rekomendasyon iti panagpila kadagiti kaso a graft, perjury, malversation, ken falsification of public documents kontra iti sumagmamano nga opisyal ken kontratista iti distrito ti Bulacan.
