LAOAG CITY – Nagturong a mismo ni Provincial Director Police Col. Joemar Labiano iti balay dagiti aglive-in partner a napalto-paltogan a nangitunda ti pannakatay da iti Barangay 21 iti ili ti San Nicolas.
Nabigbig dagiti biktima nga isuda Barangay Kagawad Joshua Madamba, agtawen ti 27 ken ti live-in partner na a ni Eloisa Jane Pagadoan Bonilla, agtawen ti 30 ken maysa nga Online Accounting Staff.
Kabayatanna, nabigbig met ti suspek a maysa a kameng ti Philippine National Police, naasawaan, taga Badoc ngem agdama a naka-assign iti Ilocos Norte Police Provincial Office ken addaan ti ranggo a police corporal.
Iti statement, naiget a kondenaren ti Ilocos Norte Police Provincial Office ti napasamak a pammaltog aglalo ket ti karaman iti daytoy ket miembro ti nailian a pulisya.
Inpasigurado ni Provincial Director Labiano nga ipakat ti Philippine National Police ti linteg ken awan ti maipaay nga special treatment.
Innayon ni Labiano a ti kinatalged ken panagtalek ti komunidad ti kangrunaan a prayoridad da.
Immunan a naireport a ti suspek ket dati nga agayan-ayat ken ti maitudtudo a motibo ket imon ken love triangle.
Kabayatanna, nakakumpiskar dagiti kameng ti Scene of the Crime Operatives nakapasamakan ti krimen ti walo nga empty fired cartridges ken dua nga slugs no sadinno a rumrumuar a nausar a paltog ket caliber 45.
Iti agdama, nagtalinaed ti suspek iti Ilocos Norte Police Provincial Office ken maisagsagana dagiti maipila a kaso a double murder ken frustrated murder kontra kenkuana.
