LAOAG CITY – Manamnama a dumuprak ti Bagyo Melissa a maibilang a kapigsaan a bagyo idiay Jamaica.
Daytoy ket kas maibasar iti weather forecast a posible a mangitunda ti napigsa nga angin ken nakaro a layos iti nasao a pagilian.
Basar iti United States-based National Hurricane Center, ti Bagyo Melissa ket naipangato iti category five hurricane.
Inbilin ti gobierno idiay Jamaica ti pannakaibakwit dagiti residente iti kabisera ti pagilian a Kingston gapu iti narisgo nga epekto ti bagyo no sadinno a nagutigot dagiti residente nga adda iti low-lying ken flood-prone areas nga agturong iti nataltalged a lugar.
Inrakurak ni Desmond McKenzie, Minister ti Local Government idiay Jamaica nga adda ti 881 a shelters ti nakalukat.
Mainaig iti daytoy, adda ti tallo nga indibidual ti natay ken ginasgasut a pagtaengan ti nalayos idiay Haiti gapu iti Bagyo Melissa iti isla ti Hispaniola idinto a maysa ti nairekord a natay idiay Dominican Republic.
Kabayatanna, adda ti maysa nga agtawen ti 13 a lalaki ti mapukpukaw kalpasan a naiyanod daytoy kabayatan nga aglanglangoy iti baybay.
