LAOAG CITY – Natay ti maysa a lalaki nga agtawen ti 43, residente iti Barangay Barikir iti ili ti Nueva Era kalpasan a nadisgrasya ti inturong na a motorsiklo.
Basar iti Philippine National Police iti ili ti Nueva Era, inreport kadakuada ni Barangay Chairman Melvin Cariño iti Barangay Barikir iti nasao nga ili nga adda ti napasamak a disgrasya iti lugar da.
Iti panagresponde dagiti otoridad iti lugar ket nakita da ti biktima a nakadasay iti igid ti kalsada karaman ti natulid a motorsiklo na.
Inpakaammo dagiti otoridad nga iti inwayat da nga imbestigasyon ket naduktalan da a ti biktima ket napukawan ti kontrol iti inturong na a motorsiklo a nangitunda ti insidente.
Gapu iti napasamak ket nagsagaba ti nakana a sugat iti ulo ti biktima a nagresulta ti pannakatay na.
Naamoan pay dagiti otoridad manipod iti live-in partner ti biktima a sakbay a napasamak ti insidente ket nagin-inom ti biktima kadwa na dagiti karruba da iti nadakamat a barangay.
