LAOAG CITY – Inpakammo ti National Disaster Risk Reduction and Management Council (NDRRMC) nga umaboten iti 52 a tattao ti natay gapo iti Bagyo Tino.
Basar iti datos ti ahensya, umabot iti 50 a tattao ti naireport a natay iti Central Visayas ken dua iti Western Visayas.
Inlawlawag met ti National Disaster Risk Reduction and Management Council a dagiti naireport a natay ken dumalan pay iti validation.
Segun kenni Office of Civil Defense (OCD) Region VII Regional Director Joel Erestain, adda dagiti nagaburan ken natupakan kadagiti natatangken a banbanag.
Inbatad na a dagiti naibakwit ket manipud kadagiti low-lying areas ken saan da a ninamnama a nangato ti danom gapo iti layos ken ado dagiti naiyanod.
Innayon na nga iti Cebu ket 48 a tattao ti natay ken maysa iti Bicol.
Malaksid kadagiti natay, 13 ti naireport a mapukpukaw ken manarimaan ti pannakabirok da ken adda pay ti 10 a nasugatan.
