LAOAG CITY – Rinugyanen ti Sang Panlungsod ditoy ciudad ti Laoag a trataren ti budget dagiti nagduduma a pangopisinaan ti gobierno lokal ditoy ciudad para iti 2026.
Immuna nga inpresentar ti Treasury Office ti proposed budget nga P39,649,864.22, nangatngato ti P3,070,573.69 no ikompara ti budget ita a tawen.
Karaman kadagiti nakailatangan ti pondo ti nasao nga opisina ket ti personal services, Maintenance and Other Operating Expenses, Traveling and training, Office supplies, Accountable forms ken Equipments.
Malaksid iti Treasury Office ket naidasar payen ti nailungalong a pondo ti Budget Office, General Services Office, City Civil Registry Office ken dadduma pay nga opisina.
Manamnama nga agtultuloy ti budget deliberation agingga intono Nobyembre 7 ita a tawen.
Maipalagip nga inpakaammo ni Konsehal Donald Nicolas, ti chairman ti Committee on Appropriations and Finance ditoy ciudad nga umabot iti nasurok a P1.5-bilyon a pisos ti nailungalong a pondo iti ciudad para iti sumaruno a tawen.
Inbatad met ni Vice Mayor Rey Carlos Fariñas a rumbeng a maipasa ti pondo para iti 2026 sakbay nga agngudo ti Nobyembre ita a tawen.
