LAOAG CITY – Inpasigurado ni Presidente Ferdinand Marcos Jr. nga insigida a makaawat ti tulong dagiti residente a naapektaran ti Bagyo Tino kalpasan nga inbilinna kadagiti amin nga ahensia ti gobierno ti napaspas a panagresponde iti kalamidad.
Inbatad ni Presidential Communications Office (PCO) ken Palace Press Officer Undersecretary Claire Castro, nakadanonen kadagiti naapektaran a lugar dagiti ahensia ti gobierno tapno mangipaay ti taraon, agas ken dadduma pay a kangrunaan a kasapulan.
Inlawlawagna nga insigida a nangipatulod ti Department of Health (DOH) kadagiti agas, nadalus a mainum a danum, hygiene kits ken water containers idiay Cebu, Aklan ken Eastern Visayas ken kadagiti sumagmamano a naapektaran a rehion.
Kunana nga agtultuloy iti panagbantay ti Department of Health iti posible a lahar threat iti Bulkan Kanlaon gapu iti awan sarday a panagtudtudona.
Mainaig iti daytoy, nangipaay ti Department of Social Welfare and Development (DSWD) ti sumurok 121,000 family food packs ken 1,600 ready-to-eat meals kadagiti rehion ti CALABARZON, Bicol, Visayas, Caraga ken sumagmamano a paset ti National Capital Region ken Zamboanga.
Nangited pay daytoy ti tulong pinansial a tulong kadagiti pamilia a napukawan ti ay-ayatenda iti biag ken taraon kadagiti na-stranded a pasahero ken motorista.
Inpetteng ni Castro nga agtultuloy a bantay-sarado dagiti miembro ti Gabinete ti situasion tapno masigurado ti napaspas a pannakaipadanon ti tulong kadagiti amin a naapektaran a lugar.
Kabayatanna, inpadamag ni Department of Information and Communications Technology Secretary Henry Aguda a makitintinnulong ti ahensia kadagiti kangrunaan a telecommunications companies tapno mapaalisto ti panagsubli ti komunikasion kadagiti lugar a naapektaran ti bagyo.
