LAOAG CITY – Inpetteng ti Malakanyang a saan a simple a rakurak ti maipagarop a panagpangta ni Vice President Sara Duterte kontra kada Presidente Ferdinand Marcos Jr., First Lady Liza Araneta-Marcos, ken dati nga Speaker Martin Romualdez.
Segun ken ni Palace Press Officer Undersecretary Claire Castro, no saan a maibilang a panagpangta dagiti nagbalin a rakurak ti bise presidente, masapol nga ilawlawag ti kampo na no ania ti pudno a kaipapanan daytoy.
Kuna pay ni Castro a ti isyu ket adda ti pakainaigan iti national security gapu ti maipagarop a puntirya ti panagpangta ket ti presidente ti Pilipinas ken ti nagsarita ket ti nakatugaw a bise presidente.
Kinarit na pay ti kampo ni Duterte a paneknekan dagiti rason nga inlanad da kas depensa, karaman ti maipagarop a panangip-ipit iti dati a chief of staff a ni Zuleika Lopez ken ti maibagbaga a pangta iti biag ti bise presidente.
