LAOAG CITY – Inpakita ti China ti kaudian nga aircraft carrier na iti publiko.
Indauluan ni Chinese President Xi Jinping ti pannakakomision ti aircraft carrier a Fujian, a nakasanglad iti military port ti Sanya, a masarakan iti Hainan Island.
Ti Fujian ti maikatlo ken kaaduan most advanced aircraft carrier ti China nga addaan kadagiti electromagnetic catapult a makabael a mangipatayab iti tallo a klase ti aircrafts.
Ti baro a teknolohia a maawagan kas Electromagnetic Aircraft Launch System (EMALS) ket kabaelan na nga ipatayab dagiti eroplano a nakargaan kadagiti nadagsen nga armas ken karga ti gasolina tapno matamaan dagiti adayo a target da.
Naamoan a dagiti sabali pay aircraft carrier iti intero a lubong nga addaan iti EMALS systems ket ti USS Gerald R Ford.
Immuna a naiyuswat ti Fujian idi 2022 ken nangrugi a naglayag iti baybay idi 2024.
