LAOAG CITY – Mangnamnama ni Mayor James Bryan Alcid a malpas ita a bulan ti Nobiembre ti Phase 1 ti slaughter house ditoy ciudad ti Laoag.
Segun kenni Alcid, masapol a makita no daytoy ket functional gapu ta iti bulan ti Desiembre ket manamnama nga umado ti maparti.
Kunana a ti bilang dagiti maparparti a baboy iti inaldaw iti slaughter house ket umabot iti 92 aginnga 94 ken iti umay nga holiday season ket manayonan iti 20% dagiti maparti a baboy.
Inlawlawag na pay nga iti pannakaipalawa ti slaughter house ket maakomadar na iti 100 agingga 200 a bilang dagiti maparti.
Maipalagip a kalikagom ni Alcid a mapagbalin a “double A” ti category ti slaughterhouse ditoy cuidad ti Laoag.
Inbatad na a babaen iti pannakapapintas wenno pannaka-upgrade daytoy ket umado met dagiti bilang dagiti maparti iti inaldaw.
Kabayatanna, kunana a no malpas daytoy a proyekto ket mabalin nga isu ti maysa kadagiti kapintasan, kalawaan ken kabaelan na nga akumodaren ti sibubukel a probinsya.
