LAOAG CITY – Aktibo a pinagtignay ti Philippine Red Cross (PRC) dagiti national headquarters, regional chapters ken volunteers-da kas panagsagsagana iti Bagyo Uwan.
Daytoy ket kalpasan a nakastreken iti Philippine Area of Responsibility ti bagyo idi Biernes ti rabii ken manamnama a pumigsa pay iti sumaruno a 24 nga oras.
Posible nga ag-landfall daytoy iti abagatan a paset ti Isabela wenno amianan a paset ti Aurora inton Domingo ti rabii wenno Lunes ti parbangon.
Manamnama ti napigsa a panagtudo, napigsa nga angin ken storm surge kadagiti sumagmamano a paset ti Luzon, Bicol, Eastern Visayas ken Mindanao.
Nangiwayat ti Philippine Red Cross ti nationwide readiness operations pakairamanan ti panagimbentaryo ti kagamitan, koordinasion ken panagalerto kadagiti RC143 volunteers.
Maikabkabil metten dagiti relief goods ken rescue assets kadagiti vulnerable areas.
Nagpanawagan ti Philippine Red Cross iti publiko nga agtalinaed nga alerto ken makikoordinar iti Philippine Red Cross Hotline #143 para iti tulong.
