LAOAG CITY – Nagpanawagan ti sumagmamano nga animal welfare groups a saan a liplipatan ti kinatalged dagiti taraken nga ayop iti panawen ti kalamidad kas ti iduduprak ti bagyo.
Iti babaen ti kampanya a “No Pets Left Behind”, pinalagipan dagiti organisasyon kas ti PETA Asia ti publiko nga iraman dagiti taraken iti evacuation plans.
Segun kadakuada, napateg nga isagana ti pet emergency kit a naglaon ti taraon, danom, agas, leash, ken carrier tapno masigurado ti kinatalged dagiti taraken nga ayop.
Inpetteng pay ti grupo a saan a rumbeng nga ibati a nakatali wenno nakapupuk dagiti taraken iti uneg ti balay, iti arubayan wenno iti bubongan gapu iti risgo ti panaglayos ken napigsa nga angin.
Innayon dagiti animal welfare advocates a dagiti evacuation center ket masapol nga agbalin a silulukat ken nakasagana nga agawat kadagiti taraken nga ayop tapno maliklikan a maisina dagitoy iti pamilya da.
Nagpanawagan dagiti grupo iti gobierno ken lokal nga otoridad nga iraman iti rescue ken disaster response dagiti ayop, gapu ta paset da iti kada komunidad.
