LAOAG CITY – Inpasan ti United States Senate ti funding bill tapno agngudon ti government shutdown iti uneg ti sumagmamano nga aldaw.
Karaman ti walo a Democrats ken dagiti Republican ti nagbutos tapno agngudon ti shutdown.
Iti pinal a bersion ti gakat, naiyalud-od daytoy ti government funding agingga iti Enero inton sumaruno a tawen.
Karaman pay ditoy ti tallo a tawen a funding bills para kadagiti nagduduma a federal agencies ken dagiti programa ken panagsubli ti federal workers nga inikkat iti kangitingitan ti shutdown.
Kasukat iti panangpabor ti walo a Democrats, immannugot ti Republicans nga agbinnutos iti katengngaan inton Disiembre mainaig iti pannakaiyalud-od pay ti health care tax credits.
Kasapulan ti panangaprobar ti nasao a funding bill manipud iti United States House of Representatives ken pirma ni United States Pres. Donald Trump sakbay nga agngudo ti shutdown.
Dumanonen iti 41 nga aldaw sipod a nag-shutdown ti gobierno ti Amerika, ti kaatiddogan a nairekord iti pakasaritaan ti Estados Unidos a nagresulta iti temporario a pannakasuspenso kadagiti serbisio ti gobierno ken nangibati ti 1.4 milyon a federal employees nga awan ti paid leave wenno agtrabtrabaho nga awan ti sueldo.
Nangitunda ti shutdown ti problema kadagiti eropuerto ti Estados Unidos no sadinno 7,000 flights ti naitantan ken 2,000 flights ti nakanselar gapu iti kinakurang dagiti staff.
Immunan nga inpetteng ni Trump iti air traffic controllers a saan a nabayadan iti kangitingitan ti shutdown a nagsublin iti trabaho ken nagpangta kadagiti saan nga agtungpal.
