LAOAG CITY – Maysa a suicide bomber ti nangpapatay ti 12 nga indibidual iti kabisera ti Pakistan iti kumarkaro a kinaranggas dagiti militante.
Segun ken ni Defense Minister Khawaja Muhammad Asif, daytoy ti nangiduron iti pagilian iti maysa nga “state of war.”
Inakusaran dagiti ministro ti gobierno ti Pakistan ti kaasideg nga Afghanistan ti pannakikunsabo iti nasao nga insidente a maysa nga akusasion a naglikudan ti Kabul ken inkarida ti panangibales no dagiti otoridad ti Afghanistan ket napaay a lapdan dagiti militante nga ibagbaga ti Islamabad a responsable.
Inbatad ti Defense Minister, adda iti babaen ti “state of war” ti pagilianda kalpasan ti panangatake kadakuada.
Kunana a daytoy ti umuna a panangraut kadagiti sibilian iti Islamabad iti uneg ti maysa a dekada.
Inlawlawagna a nakabalud ti Pakistan iti panagsango ti Kabul ken New Delhi a nakilaban iti uppat nga aldaw a gubat idiay India idi Mayo ken kalpasan iti napalabas a bulan ket nangiwayat kadagiti airstrike idiay Afghanistan pakairamanan ti Kabul kas sungbat iti dinakamatna a daytoy ket presensia dagiti militante a Pakistani iti lugar.
Inpettengna a dagiti simmaruno a rinnupak ti Pakistan ken Afghanistan ket nangitunda ti saan a naballigi a panagsinnarita maipapan iti kinakappia.
Kabayatanna, naiget a naglikudan ti kangrunaan a Pakistani jihadist group a Tehreek-e-Taliban Pakistan nga ad-adda nga am-ammo iti awag a Pakistani Taliban ti pannakairamanda iti panangatake.
