LAOAG CITY – Inbatad ti Department of the Interior and Local Government a 24 a government officials ti sumangsango iti administrative sanctions kalpasann ti saan da a panangsurot iti travel ban.
Segun kenni DILG Secretary Jonvic Remulla, dagiti opisyal a kaadoan ket mayor, ket timmalaw ditoy pagilyan iti laksid ti direktiba nga agtalinaed ken idaulwan ti disaster preparedness and relief operations kadagiti bukod da a lugar sakbay pay ti iduduprak ti Super Typhoon Uwan.
Iti laksid ti travel ban manipud Nov. 9 agingga iti 15, kuna ni Remulla a napan latta iti sabali a pagilyan dagiti local officials.
Inpetteng na a no adda ti konsensya dagitoy ket mas pinili da kuma ti nagtalinaed iti pagilyan.
Inbatad na a daytoy ti nasken nga ilawlawag dagiti maseknan gapo ta ti inaramid da ket clear-cut guidelines.
Kuna ni Remulla a dagiti opisyal ket nasken nga agsungbat iti gross insubordination ken abandonment of duty gapo iti panangpanaw kadagiti kalugaran na a nagsagaba iti didigra.
Kabayatanna, napagsasaritaan met ni Neophyte Mayor Nico Dotillos iti ili ti Borbon gapo ta isu laeng ti kakaisuna a mayor iti typhoon-battered northern part ti Cebu ti nangkanselar iti byahe na a mapan iti London a sakbay ti iduduprak ti bagyo Tino.
