LAOAG CITY – Natay ti uppat nga indibidual ken dinosdosena ti nasugatan gapu iti Russian drone ken missile strikes idiay Kyiv basar ken ni Ukrainian President Volodymyr Zelensky.
Naiget a kinondenar ni Zelensky ti nasao a panangatake ti Russia no sadinno nga agarup 430 a drones ken 18 a missiles ti naiwayat a nangitunda ti pannakadadael ti dinosdosena nga agkakadakkel a pasdek.
Basar iti air force ti Ukraine, karaman a nadadael ti energy infrastructure ti Kyiv ken sumagmamano a pasdek kadagiti dadduma a region iti pagilian ket nairaman pay.
Nadadael ti Russian Black Sea port ti Novorossiysk iti nagpatnag a panangraut idiay Ukraine.
Mainaig iti daytoy, inrakurak ni Krasnodar Governor Veniamin Kondratyev nga adda ti tallo a crew members ken sabali pay nga indibidual ti nasugatan iti panangatake ken nadadael ti main oil depot ken ti container terminal.
Indeklarar ni Mayor Andrei Kravchenko ti state of emergency kalpasan a nagsardeng ti oil exports iti lugarda.
Inbatad ni Tymur Tkachenko, mangidadaulo ti city military administration a nadadael dagiti residential buildings iti kada distrito idiay Kyiv gapu iti panangatake.
Segun iti emergency services, adda dagiti nagtennag a debris, nauram dagiti multiple high-rise apartment buildings, ospital, pagadalan ken administrative buildings.
Naammoan nga adda ti sumurok 40 a tattao ti na-rescue pakairamanan ti 14 nga indibidual idinto a maysa ti pimmusay iti nauram a residential building iti Desnayanskyi district.
Kabayatanna, nai-deploy ti medical teams kadagiti nakapasamakan ti uram nga adda ti siam a tattao ti manarimaan a matamtaming iti ospital ken maysa ti adda iti kritikal a kondision.
