LAOAG CITY – Ad-adda pay a pimmigsa ti panangipetteng ni Cavite 4th District Rep. Kiko Barzaga a nasken a maibalud ni Presidente Ferdinand Bongbong Marcos Jr.
Daytoy ket kagiddan ti panangibutaktak ni dati a Congressman Elizaldy Co nga inbilin kenkuana ni Presidente Marcos a mangiserrek ti ₱100 billion a gatad ti proyekto iti pundo ti Department of Public Works and Highways (DPWH) iti babaen ti 2025 national budget.
Iti post-na iti Facebook, inbatad ni Barzaga nga inikkan dagiti Pilipino ni Presidente Marcos ti gundaway a baliwan ti legacy nga inbati ti amana a ni dati a Presidente Ferdinand Marcos Sr. ngem nakarkaro pay daytoy.
Atapen ni Barzaga a posible a karaman kadagiti ebidensia iti flood control scandal iti nauram a pasdek ti Department of Public Works and Highways idiay Quezon City iti kallabes.
Inlawlawag ni Barzaga, posible nga awan ti maibalud nga agtatakaw iti gobierno agingga nga adda iti Malakanyang ni Marcos.
Gapu iti daytoy, naminsan manen nga inlungalong ni Barzaga ti panangikkat iti maipatpataw a Value Added Tax kadagiti produkto ken serbisio gapu ta inpettengna nga apay pay laeng agbayad ti buis no takawen met laeng daytoy.
