LAOAG CITY – Naduktalan a sipud simmrek iti politika ni Vice President Sara Duterte kas Vice Mayor ti Davao City idi tawen 2007, makita ti dakkel a nagbaliwan ti indeklararna a net worth a nakabasar iti impilana nga Statement of Assets, Liabilities and Net Worth (SALN).
Idi tawen 2007, indeklarar ni Duterte ti net worth-na a P7,250,497. ket naglabas ti maysa a tawen, kalpasan ti umuna a tawenna kas bise mayor, sumurok dimmoble ti net woth-na ket immabot daytoy iti P18,493,616.65 idi tawen 2008.
Idi 2009, bimmaba ti indeklararna a net worth iti P18,281,264.65. ken bimmaba pay daytoy iti tawen 2010 agingga 2011 no sadinno ket immabot laeng iti P14,271,148.45.
Dimteng ti tawen 2012, idi nagserbi ni Duterte kas Mayor ti Davao City, ngimmato ti indeklararna a net worth iti P22,116,101.93 ken nagtultuloy pay daytoy a ngimmato bayat a bumaybayag ti panagserbina.
Kabayatanna, idi nakastrek ni Duterte iti national politics kas Bise Presidente ti Pilipinas, immabot iti P71,508,841 ti indeklararnan a net worth idi tawen 2022. no sadinno ket ngimmato pay daytoy iti P77,508,841 idi 2023, ken idinto nga immabot pay iti P88,512,370.22 idi tawen 2024.
Idi napalabas a tawen, nanayunan manen ti P10,143,760.98 ti net worth-na, nga immaboten iti pakabukelan a P98,656,131.20.
Iti pakabukelan, basar kadagiti gatad a nadakamat, P91,405,634.20 ti pakabukelan a nagngatoan ti net worth ni Duterte manipud idi tawen 2007 agingga iti 2025.
