LAOAG CITY – Ibilang ni Atty. Juanito Antonio a ti rakurak ni dati nga Ako Bicol Party-list Rep. Zaldy Co a maysa nga script nga inusar dagiti kalaban ti gobierno tapno maikkat ni Presidente Ferdinand Marcos Jr. iti pwesto na.
Segun kenni Antonio, dimmanonen kenni Co ti kadagsenan nga ebidensya a maysa isuna kadagiti maipagarop a nangmanipular iti kurapsyon iti flood control projects.
Inbatad na a posible nga ita laeng a nairuar ti video tapno arig na maigeddan ken manggutigot iti kaadoan a makipagpaset iti maiyuswat a rally kontra iti kurapsyon.
Malaksid iti daytoy, kunana pay a dagiti rebelasyon ni Co ket mangpabara iti sitwasyon ken maitudo ni Marcos nga akin-utek iti daytoy.
Patien na a ti gagem ti adda iti likudan ti panagibutaktak ni Co ket tapno agbalin nga state witness ken isu ti mangitudo kenni Marcos.
Nupay kasta, mamati a saan a napintas ken saan a naadal a nasayaat no kasano ti panangiraman da iti presidente gapo ta nalidem nga usaren ni Marcos ti bicameral para iti insertions gapo ta iti National Expenditure Program (NEP) pay laeng ket mabalin kuman nga aramiden no kayat na gapo ta daytoy ti maibilang nga President’s budget.
Innayon na nga inconsistent dagiti rakurak ni Zaldy Co a nangiraman kenni Presidente Marcos.
