LAOAG CITY – Inrakurak ni Japanese Prime Minister Sanae Takaichi a matmaturog laeng iti uneg ti 2 agingga iti 4 nga oras iti kada rabii.
Daytoy ket iti baet a sumangsango ti Prime Minister ti kritisismo tapno gutiguten dagiti tattao nga ag-overwork.
Ti nasao a rebelasion iti kinabiit a panagturogna ket kalpasan ti naikeddeng a 3 am staff meeting iti opisinana tapno agsagana para iti parliamentary session iti napalabas a lawas.
Mainaig iti daytoy, nabayagen a sumangsango ti Japan ti arungaing maipapan iti healthy work-life balance kagiddan kadagiti naruay a mangmangged a makapaspasar ti nadagsen a pressure iti opisinada.
Naammoan nga adda ti sarita idiay Japan a “karoshi” para kadagiti tattao a natay gapu iti panag-overwork dagitoy iti trabaho.
Maipalagip a nagtugaw iti puesto ni Takaichi iti napalabas a bulan kas kaunaan a babai a nagbalin a Prime Minister idiay Japan.
Kabayatanna, agtultuloy a makumikom ni Takaichi gapu ta agatendar daytoy iti regional meetings ken mangiyuswat ti bilateral talks kaduana ni United States President Donald Trump, Chinese President Xi Jinping ken South Korean President Lee Jae-myung.
