LAOAG CITY – Nasugatan ti 13 nga indibidual kalpasan a dinungpar ti lugan dagiti aguummong a tattao kabayatan ti demolition derby idiay southeastern Australia.
Basar kadagiti otoridad, ti nasao a bilang ket dua ditoy ket adda iti kritikal a kondision.
Iti imbestigasion, manarimaan ti pannakilinnumba ti lugan iti ili ti Walcha ket kellaat a naidungpar iti alad ti grandstand ti New South Wales.
Ti car race ket tinawen a maisaysayangkat iti Walcha Motorcycle Rally babaen ti demolition derby a maysa a klase ti motorsport no sadinno dagiti driver ket agdidinnungpar dagiti luganda agingga nga adda ti maysa a lugan nga agbati a nagtalinaed a saan a naperdi.
Kabayatanna, inbatad ni Brendan Moylan, miembro ti parliament para iti Northern Tablelands, ti rehion a pakasarakan ti Walcha, iti social media nga adda ti siam nga indibidual ti nagtalinaed iti ospital nga amin dagitoy ket manarimaanen ti panagpaimbagda.
