LAOAG CITY – Balligi ti panagtataripnong ti City Disaster Risk Reduction Management Office, Philippine National Police, Bureau of Fire Protection ken Civil Security Unit ditoy siudad ti Laoag iti panagsagsagana iti panag-host ti National Science and Technology Week 2025.
Segun ken ni Dr. Melvin Manuel, mangidadaulo ti City Disaster Risk Reduction and Management Office, ti kangrunaan a napagsasaritaanda ket ti pannakaplastar iti trapiko, pagparkingan ken seguridad dagiti bisita.
Inbatadna a tapno saan unay a nairot ti trapiko ket nangaramidda ti umiso a pagparkingan dagiti behikulo kas iti sirok ti Gilbert Bridge ken iti sango ti St. William Cathedral Church ditoy siudad ti Laoag.
Mainaig iti daytoy, inpakaammona a no maipanggep iti seguridad ket nakasaganada met dagitoy kangrunaanna kadagiti kameng ti nailian a pulisia ken dadduma pay.
Immuna iti daytoy, kuna ni Mayor James Bryan Alcid nga adda ti sumurok sangaribu nga indibidual ti nakaparehistro iti nasao nga aktibidad.
