LAOAG CITY – Inabisoan ni Sen. Imee Marcos dagiti amin a Mayor a miembro ti League of Municipalities in the Philippines – Ilocos Norte Chapter mainaig iti maysa nga emergency meeting.
Basar iti social media post ti Senadora, maisayangkat ti napateg a panagtitipon iti Bacarra Municipal Hall inton bigat, Nobiembre 19, 2025 iti oras ti alas tres ti malem.
Maipawil ti proxies wenno pannakabagi dagiti Mayor iti napateg a taripnong.
Saan met a nadakamat iti abiso no ania ti napateg a banag a talantanen.
Maipalagip nga idi laeng kalman iti naiwayat a panagtitipon ti Iglesia Ni Cristo iti Quirino Grandstand ket nadagsen nga akusasion ti inbutaktak ti Senadora kontra iti kabsatna a ni Presidente Ferdinand Marcos Jr.
