LAOAG CITY – Balligi ti pannakaiwayat ti maikatlo a City Jamboree ditoy ciudad ti Laoag.
Ti nasao nga aktibidad ket nakipartisiparan dagiti boy scouts ken naisayangkat daytoy iti Ilocos Norte Regional School of Fisheries iti Barangay 32-B La Paz ditoy ciudad.
Nangrugi ti aktibidad idi Nobyembre 13 ken nagpatingga idi Nobyemre 16, 2025.
Maipalagip a sipud idi 1997 a pannakaisubli ti aktibidad ti Boy Scout of the Philippines (BSP), nakita ti kalikagom dagiti rinibo nga estudiante iti elementaria ken sekondaria ditoy ciudad.
Mamati ni Mayor James Bryan Alcid a babaen kadagiti aktibidad ti scouting, masursuro da ti agtitinnulong nga agtrabaho, panagtalek iti tunggal maysa, panagsisinnakit, panangipakita ti wagas ti panangidaulo ken pannakakita ti kabaelan.
Inpasingked ni Mayor Alcid ti suporta ti gobierno lokal ditoy ciudad gapu ta prayoridad na dagiti programa para kadagiti agtutubo a nakasentro iti disiplina, liderato ken panagserbi iti komunidad.
Innayon na a maysa ti scouting a mangbukel iti kababalin iti tunggal residente ditoy ciudad iti panagsagana para iti masakbayan.
