LAOAG CITY – Ginutigot dagiti sumagmamano a lider ti simbaan dagiti amin a karaman iti naibutaktak a nalawa a korapsion iti flood control project nga isubli amin dagiti inbulsa ken tinakaw a kuarta ti gobierno.
Iti forum nga inorganisar ti Clergy for Good Governance, inallukoy ni Rev. Msgr. Manny Gabriel dagiti amin a responsable ken nabenepisiaran iti napasamak a nalawa a korapsion a pagbabaywan ti inaramidda.
Inpetteng ni Msgr. Gabriel, ti pudno a panagbabawi ket kagiddan ti panangisubli kadagiti amin a tinakaw.
Kagiddan iti daytoy, inallukoy met ti grupo ni Presidente Ferdinand Marcos Jr. ken ti Kongreso nga isapa ti panangipasa kadagiti sumagmamano a gakat a mangipasigurado ti transparency iti gobierno.
Karaman ditoy ti panangipawil ti political dynasty, enactment ti freedom of information law, panangrebisar iti linteg mainaig iti partylist ken dadduma pay.
Kabayatanna, para ken ni Rev. Fr. Robert Reyes, sumangsango ita ti pagilian iti dadakkel a karit kas ti kumarkaro a korapsion iti gobierno, naan-anay a panagkapsot dagiti nagduduma nga institusion ti gobierno ken panangiggem ti sumagmamano iti political power.
