LAOAG CITY – Nakarikna ti panagdanag ti maysa a residente iti boundary ti ili ti Bacarra ken Vintar iti kellaat a pannakarba ti flood control project iti paset ti Bislak River.
Segun kenni Mr. Marcos Villanueva, pasado alas-otso ti rabii idi laeng Lunes, Seytembre 7 idi nakangeg da ti napigsa a ringgor.
Kunana nga idi mapan da kitaen ket narban ti flood control isut gapuna a nagdanag da gapu ta amangan no maminpinsan a marba amin ken sumrek ti danom iti pagtaengan da.
Innayon na nga idi napasamak ti insidente ket saan nga agtudtudo ken saan met a dakkel ti lebel ti danom iti karayan.
Mainaig iti daytoy, patien ni Barangay Kagawad Dom Willie Calma iti Brgy. Buyon iti ili ti Bacarra a nakapsot wenno substandard dagiti materyales ti proyekto a naikapet iti nasao a flood control a nangitunda ti kellaat a pannakarba na.
Innayon na a bassit laeng dagiti landok a nakita na iti proyekto ken patien na a saan daytoy a makaanay tapno masarapa na ti naapres a danom.
Kunana pay nga adda ti posibilidad a nakurukuran iti baba a paset ti dike isut gapuna a naggidday.
Innayon na a daytoyen ti maikadwa a gundaway a maperdi daytoy, no sadinno a ti damo ket idi adda ti dimmuprak a bagyo.
Kabayatanna, inrakurak ni Engr. Glenn Miguel iti Department of Public Works and Highways 1st Engineering District a kitaen da no saan pay a nalpas ti warranty ti proyekto nga agpaot ti lima a tawen.
