LAOAG CITY – Natay ti 33 nga indibidual gapu iti nakaro a layos iti sumagmamano a paset idiay Thailand.
Nangi-deploy dagiti otoridad ti military ships ken helicopters tapno matulungan ti pannakaisayangkat ti relief operations iti lugar.
Naapektaran ti 10 a probinsia ti nakaro a layos pakairamanan iti siudad ti Hat Yai a nakapasar ti napigsa a tudo kalpasan ti 300 a tawen nga addaan ti 335mm iti kada aldaw.
Makita iti lugar dagiti limned a lugan ken pagtaengan kagiddan ti panagur-uray dagiti residente nga adda iti tuktok kadagiti pagtaenganda tapno ma-rescue dagiti otoridad.
Mainaig iti daytoy, gapu iti awan sarday a panagtudtudona ket napasaran met ti kaparanget a pagilian ti Thailand kas ti Vietnam nga adda ti 98 ti natay iti uneg laeng ti maysa a lawas idinto nga iti Malaysia ket adda ti sumurok 19 a ribu ti napilitan a tumalaw kadagiti pagtaenganda ken iti Indonesia ket adda ti 19 a tattao ti pimmusay ken adda ti saan a bumaba iti pito ti nagaburan gapu iti panagreggay ti daga iti North Sumatra basar iti Indonesian National Search and Rescue Agency.
Kabayatanna, adda ti sumurok dua a milyon a tattao idiay Thailand ti naapektaran ti layos ngem 13 a ribu laeng kadakuada ti naiyakar kadagiti evacuation center.
