LAOAG CITY – Inadmitir ni Ilocos Norte First District Rep. Sandro Marcos a masaksaktan latta isuna kadagiti mapaspasamak nangruna iti pamiliana.
Inbatad ni Marcos a malidlidayan ken nasaktan isuna nangruna ket maipagarup nga inuulbod dagiti inibbatan a sarita ni Sen. Imee Marcos kontra iti amana a ni Presidente Ferdinand Marcos Jr.
Nupay kasta, inlawlawagna nga uray kastoy ti mapaspasamak iti pamiliada ken ti pagilian ket nakatutok latta daytoy iti trabaho.
Inpettengna a saan a pulitika ti trabahona isut gapuna nga agtultuloy latta ti panangipaayna kadagiti serbisio.
Iti isyu met ti budget insertions no sadinno nga inakusaran isuna ni dati nga Ako Bicol Partylist Rep. Zaldy Co, kuna ni Cong. Marcos nga awan ti ilemlemmengna ken nakasagana a sumango iti imbestigasion ti Independent Commission for Infrastructure.
Nakumusta met ni Presidente Marcos kenkuana ken inpetteng ni Cong. Sandro a natured ti Presidente ngem saanna nga inlibak a naliday kadagiti mapaspasamak.
Kabayatanna, nagkedked nga agkomento ni Cong. Marcos idi nasaludsod no kumusta ti relasionna kadagiti kasinsinna nga anak ni Sen. Imee gapu ta pribado daytoyen a mapagsasaritaan.
Inpasingkedna nga ay-ayatenna unay dagiti kasinsinna no sadinno nga addan ti panagsaritada ken ni Vice Gov. Matthew Marcos Manotoc.
Naammoan nga adda ditoy Ilocos Norte ni Cong. Sandro gapu iti naisayangkat a panag-turn-over kadagiti kagamitan iti Philippine National Police.
