LAOAG CITY – Natiliw dagiti uppat nga indibidual babaen iti nagsisina a buy-bust operation dagiti kameng ti Philippine National Police (PNP) ditoy probinsya iti uneg ti maysa nga aldaw.
Ditoy ciudad ti Laoag, natiliw ti aglive-in partner iti Brgy. 29, Sto. Tomas no sadinno ti lalaki ket agtawen ti 36 ken ti babai ket agtawen ti 28.
Dagitoy ket rumrumuar a naglako ti lalaki iti maipagarop a shabu iti police poseur buyer.
Nakumpiskar met dagiti otoridad ti mapapati a shabu, drug paraphernalia ken dadduma pay nga ebidensya kontra iti suspek.
Sabali pay ti operasyon a naiwayat iti Barangay 1 ditoy ciudad a nakatiliwan ti agtawen ti 30 a residente iti ili ti Pasuquin.
Naala met iti suspek ti mapapati nga iligal a droga nga agdagsen ti 16.1 grams ken agbalor ti 109,480 pesos, maysa a kalibre 38 a paltog nga addaan ti uppat a bala.
Malaksid iti daytoy, naiyuswat pay ti operasyon iti Barangay Lubnac iti ili ti Vintar no sadinno ti suspek ket maipagarop a naglako ti maatap a shabu.
Kabayatan met ti pannakakapkap ti suspek ket naala dagiti otoridad ti 10 a sachet a maipagarop a naglaon ti shabu ken agbalor ti 6,800 pesos.
Naamoan a dagiti natiliw kadagiti operasyon ket nagtalinaed iti kustudiyar ti Philippine National Police ken manamnama ti pannakaipila ti kaso a panaglabsing iti Republic Act 9165 kontra kadagitoy.
