LAOAG CITY – Ad-adda pay a pinaigetan ti Philippine National Police (PNP) ti pannakikoordinarna iti gobierno ti Israel.
Gagem daytoy nga addang a mapasayaat ti panangipaay ti impormasion wenno intelligence sharing, ilungalong ti modernisasion dagiti programa iti panagsanay dagiti pulis ken maipatungpal dagiti kapintasan a wagas ken estratehia iti panangpatalinaed ti kinatalged ti publiko pakairamanan ti panangpatibker ti community policing.
Daytoy a rakurak ket inaramid ni acting Philippine National Police Chief, Police Lieutenant General Jose Melencio Nartatez Jr., kalpasan ti panagbisita kenkuana ni Israeli Ambassador to the Philippines Dana Kursh iti Kampo Crame para iti maysa a courtesy call.
Iti nasao a panagbisita, naaddaan ti gundaway ti dua a a talantanen ti natibker a panagpagayam ken pannakikoordinar iti nagbaetan ti Pilipinas ken Israel.
Inpettengna ti pannakaipalawa ti kooperasion kadagiti nagduduma a napapateg a tay-ak pakairamanan ti seguridad, panangpapigsa ti kapasidad wenno capacity building dagiti tauhan ken ti ad-adda a pinaigetan a pannakaipaay ti impormasion.
Malaksid iti daytoy, nadakamat iti panagsarita dagiti praktikal nga inisyatiba para iti intelligence sharing pakairamanan ti posible a panagsinnukat dagiti personnel ken ti panangbukel ken panangiwayat dagiti agtipon a puersa a programa iti panagsanay.
Inbatad ni Nartatez, iti babaen kadagiti pannakibinnulig ken panagtitinnulong iti daytoy, gagem ti Philippine National Police a papigsaen ken patibkeren ti kabaelan daytoy iti crime prevention wenno pananglapped iti krimen panangsolbar kadagiti emergency wenno emergency response ken ti sibubukel a panangpasayaat ti kinatalged ti komunidad.
