LAOAG CITY – Nagbutos dagiti taga-Hongkong iti eleksion a maibilang a maysa a pannubok iti karirikna ti publiko kalpasan ti dakkel nga uram a nakapungtotan ti dadduma iti siudad.
Nangisayangkat ti dakkel a kampania ti gobierno tapno gutigoten dagiti taga-Hongkong nga agpili kadagiti miembro ti Legislative Council (LegCo) no sadinno nga amin a kandidato ket natingiting tapno masigurado a napudnoda iti China.
Naiwayat ti eleksion gapu ta naruay dagiti agladladingit iti uram iti Tai Po iti napalabas a bulan a nakatayan ti agarup 160 nga indibidual.
Nangipaay dagiti otoridad kadagiti naglabas nga aldaw ti tulong kadagiti nakalasat iti insidente, inarestar dagiti suspek ken namnamaen a mapasayaat ti kinatalged ti pasdek gapu ta dagiti sumagmamano a taga-Hongkong ket agsalsaludsod mainaig iti insidente.
Naammoan nga adda ti pakabuklan a 161 a kandidato ti agbibinnalubal para iti 90 a tugaw iti Legislative Council nga agserserbi a mini parliament ken mabalin a mangaramid ken mangamendar kadagiti linteg.
Kabayatanna, ti nasao nga eleksion ket maikadua manipud idi 2021 idi nangaramid ti dakkel a panagbalbaliw ti China iti electoral system ti Hong Kong tapno masigurado a dagiti laeng “makabayan” ti mabalin nga agpaidasig para kadagiti puesto.
