LAOAG CITY – Kinontra ni dati a Presidential Spokesperson Atty. Harry Roque ti kiddaw ti Pilipinas para iti maysa nga Interpol Red Notice kontra kenkuana nga inawaganna a panaglabsing daytoy iti international regulation ken ti pananggipit kenkuana ket gapu kadagiti politically motivated a kaso.
Naiget a kinontra ni Roque ti kiddaw a Red Notice ken inpettengna nga isuna ket maysa a protektado a bona fide asylum seeker iti babaen ti linteg ti Netherlands ken ti European Union.
Inbatadna nga adda ti opisial a dokumentona manipud iti Dutch Immigration and Naturalisation Service a mangipaneknek a protektado ti status-na.
Inpaganetget ni Atty. Roque a ti kaso a syndicated trafficking kontra kenkuana ket peke ken paset ti inawaganna a panangibales ti administrasion Marcos kontra kadagiti kaalyado ni dati a Presidente Rodrigo Duterte.
Kunana nga us-usaren ti reklamo tapno palpasen ken paulimeken isuna kas maysa a kritiko ni Presidente Ferdinand Marcos Jr.
Dinakamat ni Roque a ti kiddaw ti gobierno para iti Interpol Red Notice ket maysa a panaglabsing iti legal framework ti Interpol partikular a ti Article 2 ti Interpol Constitution a mangidatdatag kadagiti obligasion ti organisasion iti karebbengan ti maysa a tao ken ti Article 3 a mangipawpawil kadagiti kaso a pangpulitika.
Innayonna a nangisubmitir daytoyen ti pormal a panangkontra iti Commission for the Control of Interpol’s Files, ti ahensia nga addaan ti responsibilidad a mang-review dagiti kiddaw para iti Red Notice ken kiniddawna a saan nga aprobaran ti kiddaw ti gobierno ti Pilipinas.
