LAOAG CITY – Nagpakita iti telebisyon ni President Patrice Talon iti Benin tapno ipasigurado kadagiti residente iti West African nation a naan-anayen a kontrolado da ti sitwasyon iti pagilian da kalpasan ti gandat a kudeta.
Kinomendaran met ni President Talon dagiti kameng ti armad ken dagiti lider da a nagtalinaed a napudno iti nasyon.
Inrakurak ti gobierno a nalapdan da ti panagalsa sumagmamano nga oras kalpasan nga indeklarar ti grupo dagiti soldado ti panangala da ti national television.
Kalpasan iti daytoy ket adda ti nangngeg a napigsa a panagbettak iti Cotonou, ti kadakkelan a ciudad iti Benin ken ayan ti gobierno.
Naamoan a kalpasan ti napigsa a panagbettak ket nakita iti flight-tracking data nga adda ti tallo nga aircraft a simrek iti airspace ti Benin manipod iti kaparanget a pagilian, iti Nigeria.
Kinumpirmaran met ti pannakangiwat ti Nigerian President a dagiti fighter jets ket simrek iti airspace iti Benin tapno tumulong a mangpapanaw kadagiti nagplano ti kudeta manipod iti national TV ken ti military camp nga isu ti nagtitiponan da.
Ti Benin, a dati a French colony, ket maibilang kas maysa kadagiti stable democracies iti Africa, ngem sumangsango ni Presidente Talon ti akusasyon a laplapdan na dagiti mangkritkritikar kadagiti ipatpatungpal na a pagalagadan.
Maibilang ti nasyon kas maysa kadagiti kadakkelan a cotton producers iti kontinente ngem karaman kadagiti kakukurapayan a pagilian iti lubong.
