LAOAG CITY – Naglikudan ti Malacañang ti maibagbaga a plano a maikkat iti puwesto da Education Secretary Sonny Angara ken Information and Communications Technology Secretary Henry Aguda.
Segun kenni Palace Press Officer Undersecretary Atty. Claire Castro, saan a pudno daytoy gapo ta kadua da pay dagiti maseknan iti Legislative-Executive Development Advisory Council meeting ken nangipaay da kadagiti proyekto iti private meeting da iti Presidente.
Ti komento ni Castro ket kalpasan ti rimuar a report nga adda ti maikkat iti Gabinete ni Marcos kangrunaan na dagiti dua.
Ummuna iti daytoy, inbatad ni Angara a saan nga agikkat ti puwesto kalpasan a nairaman iti maipagarop a panangisngit ti pondo idi senador ken chairman ti Senate committee on finance.
Innayon na nga awan ti nagibasaran ken awan ti pammaneknek ti alegasyon kontra kenkuana.
