LAOAG CITY – Inlawlawag ni Atty. Kidd Castro dagiti nakaipalaon iti Republic Act 10591 wenno Comprehensive Law on Firearms and Ammunition.
Segun kenni Castro, nagduduma ti rason no apay nga agikot ti paltog dagiti tattao pakairamanan ti self defense gapo iti pangta wenno dadduma pay.
Nupay kasta, inlawlawag na a saan na a kayat a sawen a no adda ti pangta iti biag ti maysa nga indibidual ket mapalubusan da metten nga agitugot ti paltog uray adda pay ti kumpleto a dokumento ti armas ken ti agtagikua.
Inpetteng na nga uray adda ti lisensya nga agikot ti paltog ket adda met dagiti lugar a maiparit nga itugot iti daytoy kas iti bar wenno paggiinoman.
Mainaig iti daytoy, inbatad na a daytoy a linteg ket maiyaplikar iti amin pakairamanan ti opisyales ti barangay.
Kuna pay ni Castro nga uray dagiti uniformed personnel ket rumbeng a konektado latta iti trabaho da no adda ti bitbit da a paltog.
