LAOAG CITY – Saan a mailadawan ti kinaragsak dagiti uppat a nagturpos iti Mariano Marcos State University- College of Teacher Education gapu ta saanda laeng nakapasa no di ket karaman da pay kadagiti nagbalin a topnotchers iti 2025 Licensure Examination for Professional Teachers a naiyuswat idi Nobyembre ita a tawen.
Dagitoy ket isuda Decster Baptista, Top 6 iti Secondary Level idinto nga agpada a Top 7 da Jonathan Dave Ayala ken Michaella Abiva a dagitoy ket nagturpos iti Bachelor in Secondary Education major in English, ken Top 10 met ni Marc Ascen Domaoal manipod iti Elementary Level.
Iti eksklusibo nga interview ti Bombo Radyo Laoag, arigna agpapada ti nagbalin a reaksyon da no sadinno a saan da a ninamnama ti panagbalin da a topnotcher gapu ta ti laeng inkarkararag da ket makapasa da iti eksaminasyon.
Kuna da pay nga arigna agpapan ita ket saan pay a naan-anay a nagsink-in iti panunot da ti ibilang da a nakapatpateg a regalo kadakuada ita a paskua.
Inbatad da Baptista ken Ayala a saan a ti panagisuro ti arapaap da a pagbalinan idi ubbing da pay ngem iti panagadal da iti kolehiyo ket in-inot a nasursuro da nga ipateg ti propesyon a napili da idinto a da Abiva ken Domaoal ket inkaubingan da a ti panagisuro ti arapaap da a pagbalinan.
Inadmitir da nga ado dagiti karit a sinango da kabayatan ti panag-review da kas ti pressure, agamak da iti possible a saanda a pannakaipasa ti eksaminasyon ken ti consistency iti panagreview gapu ta adda dagiti gundaway a saanda a marikna a kayatda ti agreview.
Agpapada da met a ti nagbalin nga inspirasyon da ket ti pamilya ken papagayam da gapu iti naan-anay a suporta nga inpaayda manipod iti panagadal, panagreview agingga iti pageksamen da iti Licensure Examination for Professional Teachers.
