LAOAG CITY – Immannugoten ti Thailand ken Cambodia para iti immediate ceasefire wenno tigil-putukan iti borders-da.
Iti maysa a joint statement, nagkari ti dua a pagilian nga isardeng ti sumagmamano a deadly border clashes a nakatayan ti 101 nga indibidual ken timmalaw ti sumurok kagudua a milyon a tattao kadagiti dua a pagilian.
Pinirmaan ti nasao a ceasefire agreement da Thai Defense Minister Natthaphon Narkphanit ken ti Cambodian counterpart-na a ni Defense Minister Tea Seiha.
Basar iti Thai ken Cambodian defense ministers, agpada a kimmanunong ti agsinnungbangir a partido a pagtalinaeden ti agdama a deployment dagiti tropada nga awan ti nayon a panaggaraw pakairamanan kadagiti amin a klase ti armasda, panangisardeng ti panangatake kadagiti sibilian ken dagiti imprastruktura.
Epektibo ti ceasefire iti pangaldaw ti Sabado, oras ditoy Pilipinas. Iti oras a mapagtalinaed ti ceasefire 72 nga oras kalpasan daytoy a nagbalin nga epektibo, kuna ni Cambodian Defense Minister Tea Seiha, waya-wayaan ti grupo ti Thailand ti 18 a suldado a Cambodians a naarestarda kadagiti naglabas a rinnupakda.
Paset ti katulagan ti panangipalubos kadagiti sibilian nga agnanaed iti borders a makasublin kadagiti pagtaenganda iti kabiitan a panawen.
Immannugot pay ti dua a pagilian ti pannakitinnulong ti demining efforts ken pananglaban iti cybercrime.
Naipatungpal ti nasao a katulagan kagiddan ti naiget a peace talks iti nagbaetan ti dua a pagilian kalpasan a naminsan manen a bimmara ti tension iti borders-da iti umuna a paset ti Disiembre iti agdama a tawen.
