LAOAG CITY – Nagpanawagan ni Navotas Representative Toby Tiangco iti House of Representatives nga iruar ti kumpleto a detalye ti alokasion a pundo iti kada congressional district ken party-list sakbay ti panagbubutos para iti ratipikasion ti 2026 General Appropriations Act inton Disiembre 29.
Inbatad ni Tiangco a saan a mabalin nga agbutos dagiti agpanpanday linteg nga awan ti nalawag nga impormasion no kasano a ginudua ti pundo.
Inlawlawagna a napateg a masigurado nga awan ti distrito nga addaan ti sobra nga alokasion ken saanen a maulit ti napasamak iti 2025 General Appropriations Act no sadinno nga adda dagiti pundo a naiserrek a saan nga ammo ti pannakabagi ti distrito.
Kabayatanna, inpetteng ni Batangas 1st District Rep. Leandro Leviste a nasken nga ibutaktak dagiti amin nga aw-awagan nga “allocables” ken “incentives” para kadagiti kongresista iti babaen ti 2026 budget.
Kunana nga adda dagiti maipagarup nga alokasion manipud kadagiti nagduduma nga ahensia kas ti Department of Public Works and Highways, Department of Health, Department of Social Welfare and Development, Department of Labor and Employment, Department of Agriculture, National Irrigation Administration ken Department of Education malaksid pay kadagiti opisial a nakailanad iti dokumento.
Inbutaktak pay ni Leviste a maipagarup nga adda ti nangidiaya kenkuana kadagiti “incentives” kasukat ti butosna iti pundo.
Innayonna nga adda ti karebbengan ti publiko a maammoan dagiti amin nga alokasion ken insentibo sakbay a naan-anay a ratipikaran ti Kongreso ti nailian a pundo para inton 2026.
