LAOAG CITY – Inbatad ni Mr. Rogelio Colobong Sr., agtagikua iti maysa a paglechonan iti Brgy. 1 iti ili ti San Nicolas a marigatan da nga agbiruk ti pagalaan da ti supply ti baboy gapo iti panagngato ti demand ita nga holiday season.
Kunana a no ikompara iti napalabas a tawen ket basbassit ti napaglakoan da ita a tawen gapo iti limitado a supply.
Patien na a daytoy ket gapo ta ado dagiti aggapo iti sabali a probinsya nga ummay aggatang ti baboy ditoy Ilocos Norte aglalo ket awan ti pangta ti African Swine Fever.
Segun kenkuana, adda da metten dagiti kayatna ti agpareserba ti lechon kabayatan nga umas-asideg ti baro a tawen ngem saan da pay laeng nga agawat gapu ta saan da pay a masigurado no adda ti umdas a supply ti baboy a lechonen da.
Maipalagip nga immunan nga inbatad ni Colobong nga iti napalabas a paskua ket immabot iti sumuruk-kumurang a 80 a baboy ti naletson da ken adda ti nagngatoan ti presyo na.
