LAOAG CITY – Inrakurak ti Office of the Ombudsman a maipagarup a saan nga inpakita ni Batangas 1st District Rep. Leandro Leviste ti sibubukel a dokumento manipud iti pimmusay a dati nga opisial ti Department of Public Works and Highways a ni Undersecretary Catalina Cabral.
Daytoy ket kalpasan a dakdakamatenna nga addaan wenno iggemna ti listaan dagiti proponents dagiti maanomalya a proyekto a naala iti nasao a natay nga opisial.
Inbatad ni Assistant Ombudsman Atty. Mico Clavano, inasitgan dagiti imbestigador ti Office of the Ombudsman ti agpanpanday linteg kalpasan nga inbutaktakna nga addaan ti kopya daytoy.
Inlawlawagna a daytoy ket napasamak idi sibibiag pay ti dati nga opisial idi iripripresentarna ti legal counsel-na.
Nupay kasta, inbutaktak ni Assistant Ombudsman Clavano a ‘limited portions’ wenno paset laeng nga adda iti listaan wenno dokumento ti inprisentar ti kongresista.
Gapu iti daytoy, kunana a maisupadi daytoy kadagiti rakurak ni Congressman Leviste nga ibagbagana a naipakitan ti sibubukel a ‘Cabral Files’ iti Office of the Ombudsman.
Inpakaammona nga adda dagiti immasideg iti Ombudsman a mangibagbaga met nga addaan dagitoy ti kopya kadagiti dokumento.
Inpettengna ti kinapateg a maammoan ti orihinal nga ebidensia maidasig iti secondary ken third party copies ti rumrummuar a listaan wenno Cabral Files.
